AtReS: Revista Situasaun Juñu 2016

July 21, 2016

Iha fulan Juñu, Belun nia Sistema ba Atensaun no Responde Sedu (AtReS) kontinua halo monitorizasaun ba insidente violénsia no mudansa ba situasaun seguransa iha Timor-Leste. Monitorizasaun AtReS rejista insidente violénsia 131 mak akontese iha Juñu. Husi númeru ne’e, rejista insidente violénsia ho númeru ne’ebé aas akontese iha Munisipiu Dili ho total insidente 51, inklui insidente sériu 5 ne’ebé liga ho uza rama ambon. Sistema AtReS mós iha fulan Juñu rejista insidente violénsia hamutuk 11 mak envolve estudante sira. Entre insidente 11 ne’e, rejista insidente 5 iha relasaun ho eis-grupu arte marsiál ne’ebé governu taka tiha ona. Insidente ne’ebé envolve estudante ho estudante kuaze akontese iha area eskola nian bainhira prosesu aprendizajen la’o hela, ne’ebé sira sadik malu no baku malu. Iha mós insidente balun ne’ebé komesa husi estudante ho estudante, hafoin sira ba konvida ema husi li’ur (la’os estudante) hodi baku malu ho estudante sira iha area eskola nian. Atu hatene informasaun detallu liu no dadus estatístika hotu ne’ebé rejista iha Juñu 2016 bele lee revista situasaun kompletu.