Foin-sa’e sira nu’udar xave hodi atinje dezenvolvimentu sustentável. Importante tebes katak foin-sa’e hotu-hotu hetan asesu ida ho igualdade ba edukasaun ho kualidade, justisa, saúde, oportunidade sira ba empregu no partisipasaun iha sosiedade, no mós atu hetan protesaun husi violénsia. Liu husi aprovasaun ba Objetivu Dezenvolvimentu Sustentável iha tinan 2015 no aprovasaun ba Polítika Nasionál Juventude foun iha tinan 2016 husi VI Governu, Timor-Leste kompromete tiha ona atu la husik hela juventude ida iha kotuk.
Atu fó apoiu ba esforsu nasionál ida-ne’ebé, Organizasaun Nasoins Unidas (ONU) iha Timor-Leste no ONG Belun halo esforsu kolaborativu, hodi lansa série análize foun ida ho títulu “La iha joven ida maka hela iha kotuk iha Timor-Lesteai”. Objetivu husi série ida-ne’e mak atu hasa’e kompriensaun kona-ba situasaun no vulnerabilidade sira husi grupu juventude balu ne’ebé espesífiku no liuliu dezafiu sira-ne’ebé sira enfrenta atu hetan benefísiu hosi Objetivu Dezenvolvimentu Sustentável tinan 2030 nian. Análize ida-idak aprezenta análize situasaun ninian ne’ebé bazeia ba análize independente ba dadus kuantitativu husi Sensus Timor-Leste Tinan 2015 no ba dadus kualitativu husi diskusaun grupu foku sira, no mós evidénsia husi estudu no relatóriu sira ne’ebé hala’o tiha ona iha Timor-Leste. Rezultadu sira aprezenta situasaun foin-sa’e nian iha area moris saudavel, edukasaun, empregu no empregabilidade, partisipasaun sívika no violénsia ho krime, tuir pillar sira Polítika Nasionál Juventude nian. Análize sira-ne’e mós fó rekomendasaun sira ba Governu, sosiedade sivíl, setór privadu no parseiru dezenvolvimentu sira oinsá atu garante oportunidade sira ho igualdade ba grupu sira-ne’e iha kontextu dezenvolvimentu Timor-Leste nian. Klik iha ne’e atu le’e informasaun kompletu.