Revista Situasaun Fevereiru to’o Marsu 2018

May 7, 2018

Belun ho nia Sistema AtReS iha Fevereiru too Marsu 2018 rekolla dadus insidente violénsia hamutuk 181, no iha insidente violénsia hamutuk 24 (13%) halo husi estudante. Númeru nee konsidera iha kategoria aas kompara ho númeru rata-rata (average) iha tinan 2016 iha de’it 5.9 kada fulan. Insidente violénsia halo husi estudante akontese tanba: iha ona problema iha li’ur depois hetan malu iha eskola laran hamosu baku malu, insidente violénsia balun mosu tanba namora, balun tanba estudante involve iha grupu oioin inklui eis grupu arte marsiál no balun maibé ho númeru ki’ik mosu iha prosesu aprendizajen.

Husi insidente hirak ne’e, númeru as liu mak akontese iha Munisipiu Baukau akontese dala 8, Dili akontese dal 5, Ermera dala 4, Vikeké dala 3 no iha Ainaru, Bobonaru, Covalima no RAEOA ida-idak akontese dala 1. Insidente violénsia halo husi estudante nee balun akontese iha fatin públiku no la’ós iha eskola laran maibé sira uza hela farda eskola. Iha insidente violénsia 16 ne’ebé akontese duni iha eskola laran. Akontese iha Munisipiu Baukau dala 6, Dili dala 5, Vikeké dala 3 no iha Ainaru no RAEOA ida-idak akontese dala 1.  Atu hatene informasaun detallu liu bele haree Revista Situasaun Kompletu.