Relatoriu Peskiza – Persesaun Sira Kona-Ba F-FDTL No PNTL Tinan Sanulu Hafoin Krize

September 25, 2017

Liu tiha dékada ida, F-FDTL no PNTL, ne’ebé mak atór sentrál ba krize militár-polítika, agora hetan aseitasaun ida ne’ebé aas iha sosiedade Timor nia laran, tuir relatóriu peskiza ne’ebé Belun lansa iha loron sesta-feira, 22 Setembru iha Salaun Delta Nova, Dili.

Maibé, relatóriu – ho Títulu ‘Uluk sira foin TK. Agora sira SMA’: Persesaun Sira kona-ba F-FDTL no PNTL Tinan Sanulu Hafoin Krize – mós fó hanoin katak, konduta pesoál hosi instituisaun rua seidauk tuir públiku nia espetativa, no konklui katak hadi’a konduta ladi’ak no redús abuzu sira sei hadi’a persesaun públiku nian ba instituisaun rua en jerál iha futuru.

Favor, asesu relatóriu kompletu iha ne’e!

Relatóriu ne’e – ne’ebé oferese rekomendasaun hamutuk 34 ba F-FDTL, PNTL no instituisaun estadu relevante sira – mak rezultadu ikus hosi projetu peskiza métodu mistu ne’ebé Belun realiza iha tinan 3 nia laran, ho apoiu tékniku hosi Columbia University nia Arnold A. Saltzman Institute of War and Peace Studies no apoiu finanseiru hosi International Development Research Centre (IDRC).

Peskiza iha terrenu hosi projetu ne’e hanesan konsulta públiku ida ho sosiedade Timor ne’ebé luan tebes kona-ba ema nia persesaun no espetativa sira ba F-FDTL no PNTL dezde Nasoins Unidas nia partida iha 2012. Dadus hosi relatóriu sira ne’e kolekta hosi peskiza kualitativu iha terrenu liuhosi diskusaun grupu 39 no entrevista autór xave sira na’in 35 iha area urbana no rural iha territóriu tomak. Alein peskiza kualitativu, uza mós dadus kuantitativu hosi Fundasaun Ázia nia survei kona-ba Polisiamentu Komunitáriu no mós kona-ba F-FDTL iha Tatoli survei (ne’ebé nia pergunta Belun mak dezeña no Fundasaun Ázia mak ba halo survei). Peskiza ne’e mós uza dadus monitorizasaun ba insidente violentu sira ne’ebé jere hosi Belun nia sistema Atensaun no responde Sedu (AtReS) no monitorizasaun ba mídia.

Respondente sira ne’ebé envolve iha peskiza ne’e, dehan katak kuandu krize 2006 akontese, F-FDTL no PNTL seidauk maduru. Sira mós dehan katak hafoin krize iha dezenvolvimentu signifikante, maibé sira seidauk maduru totalmente. Respondente uitoan de’it fiar katak krize seluk hanesan 2006 bele akontese fali, no maioria respondente sente sei la akontese tanba F-FDTL no PNTL iha kapasidade atu reziste dezafiu sira iha futuru.

Relatóriu ne’ebé ho pájina 85 ne’e organiza persesaun públiku kona-ba F-FDTL no PNTL iha aspetu haat:

  1. Modelu Institusionál, ka saida mak instituisaun sira no oinsá sira organiza sira-nia an (ezemplu, sira nia estrutura institusionál).

Jerálmente, respondente sira dehan katak, Timor-Leste presiza militár no maioria rekoñese autoridade Polísia nian atu trata krime públiku sira, enkuantu respondente balun seluk sei prefere atu envolve atór tradisionál sira no uza sistema tradisionál iha rezolusaun ba krime liuliu violénsia doméstika. Alein ida ne’e, minoria signifikante julga katak, lejitimidade F-FDTL no PNTL bazeia ba pesoál hosi kada instituisaun (ezemplu, veteranu FALINTIL iha F-FDTL nia laran) ka ladún komprende ka apoia prinsipiu governu sivíl mak kontrola militár.

  1. Funsaun, ka saida mak instituisaun halo (sira nia papél).

Jerálmente, respondente sira kompriende no konkorda katak, funsaun prinsipál F-FDTL mak atu proteje nasaun hosi ameasa esterna no PNTL atu mantein lei no orden iha rai laran. Maibé minoria signifikante konfuza ka la dun kontente ho funsaun F-FDTL no PNTL ne’ebé sira hare hanesan kahur, inklui funsaun sekundária F-FDTL nian fó apoiu ba PNTL iha seguransa interna, militarizasaun PNTL no mós respondente balun sente difisil atu destingi membru F-FDTL no PNTL visuálmente.

  1. Dezempeñu, ka se instituisaun rua hala’o sira nia funsaun ho efetivu no susesu.

Jerálmente, respondente sira satisfeitu ho dezempeñu F-FDTL nian, ne’ebé sira konsidera dezempeña ho di’ak nu’udar preventivu ba ameasa esterna, no PNTL, ne’ebé konsidera efetivu tiha ona iha mantein lei no orden iha situasaun barak. Maibé respondente sira iha ideia ne’ebé diferente kona-ba se PNTL bele hetan fiar atu atua lalais, no vizivel atu prevene violénsia sira. Alein ida ne’e, respondente barak (inklui polísia sira rasik) konsidera rekursu ne’ebé la sufisiente sai hanesan kauza ida ba PNTL nia dezempeñu ne’ebé ladún másimu.

  1. Konduta, ka oinsá instituisaun sira hala’o sira-nia funsaun (ezemplu, ho maneira dixiplina ka lae).

Hosi kategoria haat ne’e, konduta hosi membru F-FDTL no PNTL mak hetan persesaun negativu liu, inklui kona-ba membru sira halo tuir regra eskrita (hanesan lei ka polítika institusionál) no regra ne’ebé la-eskrita (hanesan norma sosiál sira ba interasaun). Iha preokupasaun jerál kona-ba abuzu podér no uza forsa maka’as liu durante atuasaun sira, liuliu durante operasaun konjunta 2015 iha munisípiu Baukau, bainhira respondente sira sente katak sira uza forsa no, asédiu no tratamentu aat ba feto sira aumenta maka’as liután. Enkuantu komunidade aplauza tebes konduta polísia komunitária husi PNTL iha suku sira, relatóriu ne’e konklui katak, pontu pozitivu ne’ebé polísia komunitária halo ona ladún iha efeitu másimu tanba konduta ladi’ak hosi polísia unidade seluk nian.

Atu rezolve problema sira iha leten no mós problema sira seluk ne’ebé rezumu iha relatóriu, Belun oferese rekomendasaun sira ba objetivu tuir mai:

  • hadi’ak konfiansa públiku ba futuru lider F-FDTL
  • hamenus komentáriu públiku hosi lideransa F-FDTL kona-ba asuntu sivíl sira iha mídia
  • esklarese funsaun instituisaun rua nian
  • limita uza F-FDTL ba operasaun seguransa iha rai laran
  • asegura rekursu adekuadu ba PNTL no aumenta asesibilidade ba populasaun
  • enkoraja dezenvolvimentu no uzu matrix ba monitorizasaun no avaliasaun ba dezempeñu Polísia nian
  • orienta fila fali PNTL ba sira nia natureza Polísia komunitária
  • reduz persesaun kona-ba parsialidade instituisaun rua nian iha servisu loroloron no iha prosesu rekrutamentu
  • hadi’ak mekanizmu kontrolu, keixa no dixiplina interna hosi instituisaun rua.

Relatóriu no rekomendasaun kompletu bele asesu iha ne’e!

Ba informasaun liután, favor kontaktu:

  • Luis da Costa Ximenes – luis.belun@gmail.com ka +670 7723 4406
  • Jesuina Maria do Rosario Abel – jesuina.belun@gmail.com ka +670 7700 3952
  • Bertanizo Guro da Costa – bertanizo.belun@gmail.com ka +670 7766 8143
  • Zachary Abugov – zach.belun@gmail.com