Relatorio Politika – Transformasaun Konflitu iha Timor Leste; Studu konaba RPRK

March 24, 2015

Rede Prevensaun no Responde Konflitu mak hanesan rekursu alternativa iha komunidade hodi responde no transforma (tensaun) konflitu ne’ebé fó ameasa ba seguransa no estabilidade liu husi atividade dame. Liu husi envolvimentu ativu atór pás iha komunidade nia leet, RPRK konsege implementa planu asaun dame liu 100 dezde 2009 ne’ebé fó impaktu pozitivu ba mudansa tensaun konflitu iha komunidade.

Papél Rede Prevensaun no Responde Konflitu (RPRK) iha prosesu transformasaun konflitu, no hametin dame no estabilidade iha komunidade importante tebes. Estabelese husi ONG Belun ho autoridade lokál, lideransa komunitária no tradisionál iha postu administrativa 43 nia laran hahú iha tinan 2009, RPRK sai hanesan fukun ida hodi halibur atór pás lokál hodi komunika ba malu, fahe informasaun no ideas, servisu hamutuk ba prevensaun no responde konflitu no harii dame. Ho apoiu husi sosiedade sivíl, governu, ajénsia lokál no internasionál balun, RPRK ezekuta ona planu asaun dame 100 resin iha postu administrativa 43 envolve entidade oioin, hodi responde direta ba abut konflitu sira ne’ebé mosu husi problema sosio-estrutural, no mós redús tensaun konflitu komunitária.

Iha relatóriu peskiza ida ne’e, ONG Belun hamosu rekomendasaun xave ba parseiru relevante sira hodi ajuda hametin kapasidade atór pás iha RPRK nune’e bele envolve ativu liután iha prosesu transformasaun konflitu, hametin dame no estabilidade iha komunidade ba futuru. Atór pás iha rede hatene situasaun iha komunidade no bele responde di’ak liu ba problema sira, maibé seidauk hetan atensaun másimu husi parseiru sira seluk hodi ajuda responde efetivamente ba sustentabilidade pás. Haforsa investimentu iha kapasidade ho alvu espesífiku no serbisu besik ho komunidade ho komunikasaun no konfiansa maka’as iha atividade sir abele ajuda rede sai forsa liu iha futuru.

Atu asesu ba relatoriu peskiza kompletu, click iha link tuir mai: Relatorio Politika.