Alerta AtReS: Insidente Detallu Liga ba Asalta Rama Ambon Ne’ebé Hakanek no Halakon Ema Nia Vida iha Kapitál Dili

Bazeia ba rezultadu monitorizasaun Belun liu husi Sistema Atensaun no Responde Sedu (AtReS) rejista insidente violénsia asaltu fíziku uza rama ambon hamutuk 19 mak akontese iha kapitál Dili hahú husi fulan Janeiru 2016 to’o agora, ne’ebé rezulta joven nain 2 mate iha fatin no joven nain 15 hetan kanek grave. Maioria asalta rama ambon ne’e akontese entre tuku 07. 00 kalan ‘o tuku 03. 00 dadeer madrugada, ne’ebé hala’o husi ema deskoñesidu iha estrada públiku ne’ebé nakukun. Suku rua mak sai fatin risku liu ba asalta rama ambon ne’e mak Suku Comoro ho total insidente 8 no Suku Bairru-Pite hamutuk insidente 6. Iha insidente rua mak deskonfia envolve membru eis-grupu arte marsiál, maibé Belun deskonfia katak, maioria asalta rama ambon seluk mós iha relasaun ho membru eis-grupu arte marsiál tanba vítima sira mós iha relasaun direta no indiretu ho grupu arte marsiál ne’ebé governu taka tiha ona. Atu hatene informasaun detallu liu bele hare.