AtReS: Revista Situasaun Jullu 2017
Iha fulan Jullu 2017, Belun nia Sistema ba Atensaun no Responde Sedu (AtReS) kontinua halo monitorizasaun ba insidente violénsia no mudansa situasaun seguransa iha Timor-Leste. Dadus monitorizasaun rejista insidente violénsia 128 mak akontese iha Jullu. Husi insidente 128 ne’e, rejista insidente 48 ne’ebé iha relasaun ho eleisaun parlamentár 2017, liu-liu iha tempu kampaña, loron eleisaun no tempu kontajen votu. Dadus mós rejista insidente sa’e iha Postu Administrativu balun hanesan Postu Administrativu Baukau no Laga iha Munisipiu Baukau, Postu Administrativu Oesilo – RAEOA no Postu Administrativu Remexio, Munisipiu Aileu. Atu hatene informasaun detallu liu no dadus estatístika hotu ne’ebé rejista iha Jullu bele lee Revista Situasaun Kompletu.
Ko'alia Kona-ba Rezultadu 2007 - 2017
AtReS: Revista Situasaun Juñu 2017
Iha fulan Juñu 2017, Belun nia Sistema ba Atensaun no Responde Sedu (AtReS) kontinua halo monitorizasaun ba insidente violénsia no mudansa situasaun seguransa iha Timor-Leste. Dadus monitorizasaun rejista insidente violénsia 107 mak akontese iha Juñu. Númeru ne’e konsidera tun kompara ho númeru insidente violénsia iha fulan sira antes no iha de’it insidente violénsia 1 mak iha relasaun ho Partidu Polítiku ne’ebé akontese iha Vikeké. Atu hatene informasaun detallu liu no dadus estatístika hotu ne’ebé rejista iha Juñu bele lee Revista Situasaun Kompletu.
Alerta AtReS: Insidente Violénsia 28 Akontese iha Tempu Kampaña Eleisaun Parlamentár 2017, Maske Ladún Sériu
Bazeia ba rezultadu monitorizasaun Belun liu husi Sistema Atensaun no Responde Sedu (AtReS) ba insidente violénsia eleitorál ne’ebé akontese iha tempu kampaña eleisaun parlamentár hatudu iha maturidade polítiku ne’ebé aas husi povu nune’e la rejista insidente grave. Maske nune’e, Sistema AtReS mós rekolla insidente ne’ebé akontese durante konsolidasaun no tempu kampaña iha eleisaun parlamentár hamutuk insidente 28. Husi insidente 28 ne’e, iha insidente 13 mak uza forsa fíziku ne’ebé kauza ema na’in 11 hetan kanek (na’in 2 kanek grave tanba sona ho tudik). Detallu kona-ba karakterístiku insidente hotu ne’ebé rejista bele haree Alerta Kompletu.
AtReS: Revista Situasaun Maiu 2017
Iha fulan Maiu 2017, Belun nia Sistema ba Atensaun no Responde Sedu (AtReS) kontinua halo monitorizasaun ba insidente violénsia no mudansa situasaun seguransa iha Timor-Leste. Dadus monitorizasaun rejista insidente violénsia 134 mak akontese iha Maiu. Husu númeru ne’e insidente liga ba Grupu Arte Marsiál (GAM) no Grupu Arte Ritual (GAR) rejista nafatin ho númeru aas ho total insidente violénsia 14. Dadus mós rejista insidente violénsia 6 mak envolve Pesoál PNTL no pesoál F-FDTL. Iha insidente 4 mak pesoál PNTL uza pistola hodi tiru ameasa no tiru ba ema iha Dili no Letefoho, Ermera. Atu hatene informasaun detallu liu no dadus estatístika hotu ne’ebé rejista iha Maiu bele lee Revista Situasaun Kompletu.